مشاكل امتحانات الثانوية العامة

[نورسين]

مش مشكله ان فى امتحان العربى 3 ثانوى
جالهم سؤال ما جمع كلمه وحى وكمان ضعها فى جمله مفيده !!!!!
ولا المشكله انه سأل ما هو عكس كلمه فجأه !!!!!
ولا المشكله ان فى واحد اخد ورقه الاجابه بتاعته وهرب من المدرسه
ولا المشكله ان الاهالى قطعوا الطريق فى اماكن كتير
ولا المشكله ان الطلاب طلعت عملت مظاهره فى كذا مكان
ولا المشكله ان الامتحان هو اسوأ امتحان عربى يمر على الثانويه العامه فى التاريخ
المشكله ان احنا خلاص بقينا مصدقين ان الدرجه بتفرق وان التعليم شئ اساسى
فى بلد مفيهاش تعليم
يعنى ايه مقفل كمبيوتر ومش عارف حتى تسطب نسخه للجهاز بتاعك
يعنى ايه مقفل فلسفه وانت فاشل فى الحوار مع الناس
يعنى ايه مقفل علم نفس وانت مش عارف ايه الى مضايقك ولا فاهم الناس
يعنى ايه مقفل عربى وانت اصلا فاشل املاء
يعنى ايه مقفل انجليزى ولما تيجى تشتغل لازم تكون واخد كورسات عشان الانجليزى بتاع المدرسه ده ميأكلش عيش
يعنى ايه مقفل ايطالى وانت عمرك ما هتروح ايطاليا اصلا ولا هتشتغل بالايطالى
يعنى ايه تقفل دين وانت مبتركعهاش وماشى مع 9 بنات والكدب والسب على لسانك 24 ساعه
يعنى ايه مقفل جبر وانت مش عارف انت هتستخدمه فى ايه اصلا هو والتفاضل وتكامل ومش عارف الداله دى بيتعمل بيها ايه فى الحياه العمليه ومش عارف تكون منظم اقتصاديا
يعنى ايه مقفل احياء وانت متعرفش ان التعبان بيبيض وان الدولفين من الثدييات ومتعرفش ان الطماطم فاكهه ولو سألتك عن طول الامعاء مش هتعرف (9متر)
يعنى ايه تبقى مقفل كيمياء وانت متعرفش اضرار اكل كتير فى حياتنا زى الشيبسى الماده الحافظه الى فيه هى نفس الماده الى بتستخدم فى حفظ الجثث فى المشرحه
يعنى ايه مقفل تاريخ وانت مؤيد مرسى او مبارك او السادات او عبد الناصر ومتعرفش ان مفيش واحد فيهم مزادش فى عصره ديون مصر وان اخر واااحد عمل نهضه بجد كان محمد على و اول خطوه عملها انه عزل القضاء وحكم منفرداً وطبعا لو حد عمل كده دلوقتى هنقتله
يعنى ايه مقفل جغرافيا وانت هتستفيد ايه لما تعرف ان العراق فيها 33 مليون نخله وان استراليا عدد الخرفان فيها اكتر من سكانها بأضعاف ده انت بتوصل بيتكم بالعافيه
يعنى ايه مقفل فيزياء وتقف على كوبرى على النيل مش عارف انت لو نطيت هايحصل ايه بظبط وتبقى عايش على احتمالات لحد ما تشوف نطه فى فيلم وتنط وانت مش عارف انت المفروض تنزل ازاى بظبط فتتفاجئ ان مفيش عضمه فى جسمك سليمه
استفدت ايه من الى درسته لغايه دلوقتى فى مصر ؟؟
تفتكر الشغل الى هتشتغله لما تكبر هايكون له علاقه بأى حاجه درستها
اسأل اى واحد متوظف فى اى وظيفه جديده ايه اول كلمه سمعها هايقولك قالولى انسى بقى كل الى انت درسته والى تعرفه عن الشغل ده وبدأوا يعلموه
بلد الشهاده فيها مجرد ورقه فى برواز على الحيطه عشان بابا وماما يتباهوا بيها لما يجيلنا ضيوف